غريبة

غريبة اوى انا لان حصلى حاجات كتير فى الفترة اللى فاتت دى لكنى ماليش نفس خالص ادخل اكتبها على المدونة مش عارفة لية مش بس كدة انا ماليش نفس لاى حاجة غير ان الجهاز من كام يوم كدة وهو مقفلها فى وشي يمكن انا زهقانة شوية يمكن اكون داخلة على مرحلة اكتئاب بس الاكيد انى الحمد لله مرحلة الاكتئاب مبتكملش معايا كتير يمكن انا بطبيعتى مش كئيبة ومش نكدية وكمان مش بحب ادى المواضيع حتى لو كانت مهمة حجم كبير عشان مزعلش عليها اوي الاهم من كل دة انى راضية بكل حاجة يعني دايما شايفة ان الخيرة فيما اختارة اللة وطبعا كدة احسن يعنى بعد ما كنت مستبعدة انى ادخل اثار مصرى اللى انا بعشقها عشان التقدير لازم يكون جيد افاجئ انهم غيرو الموضوع دة والتحويل بقى مقبول ومادة كمان بس انا اللي اللى ملحقتش على قد ما زعلت طبعا رجعت قولت الحمد لله اكيد ربنا عايزنى شعبة عامة يعنى حاجات كتير مضيقانى وتعبانة منها كمان فى الكلية مطلوب منى بحث المفروض انه هيتقدم اول نوفمبر وانا لسة مكتبتش فية كلمة ولا جمعت معلومات ولا اى حاجة حتى الدخول على المدونة بقى حاجة تقيلة عليا زهقانة بشكل كمان فى حد معين هو عارف نفسة واحشنى بشكل هموت واشوفه بجد عايزه اقولة انى حتى لو كنت بقولك قبل كدة انك واحشنى بس بجد لاول مرة احس انك واحشنى اوى كدة اللى هيجننى انى مش قادرة اعرف انا وحشاة بنفس الشكل ولا اية ؟ من كتر مهو واحشنى عايزة اكلمة كل دقيقة بس للاسف مينفعش لان اللى يعرفنى كويس يعرف انى مش سهل يبان عليا انى بحب حد اوى كدة او مش من السهل انى ابين لحد انه مهم فى حياتى اوى كدة عامة حتى كلامى على المدونة ماليش مزاج اكملة وهحاول انام من غير ما افكر يمكن انام

مدينة الصداقة

اثنا تصفحى بعض صفحات الانترنت دخلت الى منتدى غريب اوى كان مكتوب فية عن الصداقة ولانى بحب القراة جدا دخلت اقراة لان عنوانة لفت نظرى جدا العنوان كان (هل تعيش فى مدينة الصداقة ) وبسرعة كنت هجاوب على نفسى واقول طبعا لان صحابى كتير وبحبهم جدا بس لقيت ان الموقع محدد اشياء لابد ان تتوافر فى مجموعة الاصدقاء حتى يعيشون فى مدينة الصداقة اولا تعريف المدينة كان (مدينة موجودة حوالينا وبتتكون من اى مجموعة اصدقاء لابد وان تتوافر لهم عدة صفات)اولها لابد ان نجد فى المدينة عدة مصطلحات مثل حب،فرح،سلام،ضحك،تعبير عن المشاعر،كتمان اسرار.وعرفت ايضا ان مدينة الصداقة لابد ان تحتوى على مجموعة الوان مثل ازرق: وهو تعبير عن اسرار الصديق مع مجموعة اصدقاء لاتخرج منهم اخضر:سلام وامان حيث لا يخالف احد الاخر اسود:احزان تقع اذا مس احد الاصدقاء سؤ فتجد الباقى يبكون علية احمر:حب لا مثيل لة بين الاصدقاء اصفر: تشجيع بعضهم لبعض الموف: مشاعر وذكريات تربط بينهم ويتذكروها فى تجمعاتهم البنى:هدوء وراحة نفسية اثناء وجودهم معا هذة محتويات يجب ان تكون موجودة فى مدينة الصداقة اما عن قواعد هذة المدينة فهى الصداقة،الوفاء،الحب،الامانة ،والهدايا ،والمشاركة فى الاحزان والافراح اما هناك مخالفات تكلفك الخروج من المدينة مثل الكذب،الغدر،الكرة،الانانية، البخل،الا مبالاة وبعد ان قرات كل هذا تاكد من ان اصدقائى استطاعو ان يجعلونى من اهل هذة المدينة فنحن مجموعة اصدقاء منذ ستة سنوات تقريبا تتكون الحمد لله ساعات بحسد نفسى عليهم وكتير بقول لو كنت عايشة من غير اصحاب كنت هكون عاملة ازاى يعنى لو عندى زمايل جيران احباب لكن معنديش اصحاب لكن الحمد لله انا عرفتهم وعرفت اهاليهم وحبتهم وهما كمان عرفونى وعرفو اهلى وحبوهم هما اصبحو فى البيت عندى حاجة مهمه حتى لاهلى اصحابى احنا مجموعة مكونة من كل حاجة يعنى انا مش متخلية انى ممكن اعيش من غير خفة دم سوكا او مثلا اعيش من غير ما اسمع قصص حب الرومانسية روجا او اسمع اغنية يادبلة الخطوبة ومفتكرش شيمو او ان اشوف كرامتى بتمنعنى اعمل حاجة بحبها ومفتكرش لومىاو انى مثلا اقعد اسبوع من غير ما اشوف دونى انا خلاص مبقاش ينفع بالنسبة لى مينفعش رمضان يكون رمضان من غير ما نجمع نفطر كلنا عند كل واحدة يوم وفى كل البيوت نلاقى نفس الترحيب من الاهل اشوف مامتى وهى مبسوطة انى عندى صحاب زيهم انا بجد كتييييييييييييييير بحسد نفسى عليهم ربنا يخليهم ليا ولااهاليهم وتحقق كل واحدة منهم الامنية اللى بتتمناة واشوفهم كلهم عرايس زى القمر

صابرين على الايام وياريتنا عايشنها ساكتين ومفيش كلام احلامنا نسينها لا الدنيا عجبانا ولا احنا عجبنها دنيا اسية علينا واللي مكفينا والحظ مش لينا ويوم ما الدنيا تضحك فجاءة تقلب علينا يازمانا رسينا هدى وعدينا لو كنا نستاهل من الدنيا حاجة واحدة الخمها وادينا فين الاقى طوق النجاة اوصل حتى لبر واعيش تاني حياة مفيهاش جراح ولا شر دنيا راضية علينا لفت نظري كلمات الاغنية الحزينة دي واللي كتبها شاب عشان اقول راى فيها وراى والله يا هزيم حقيقي الكلمات توحى ان مش انا الوحيدة اللي حاسة ان الدنيا مش راضية علينا بس على فكرة حتى لولقيت دنيا جديدة هتلاقيها برضة مش راضية علينا عارف لية لان احنا اللي بنزعل الدنيا منا بس على فكرة كمان الكلمات جامدة جدا

عيد سعيد

اليوم هو اول ايام عيد الفطر المبارك تمام زية زى كل الايام مفيش اى طعم فى اى حاجة حتى زمان كانت الناس بتتعب من اكل الكعك لكن دلوقتى الكعك اتغش زية زى كل حاجة فى مصر زى الشعب المصرى نفسة ما اتغش واضحك علية فى كل حاجة كل حاجة اتغيرت الفرحة بتاعة العيد بقت حاجة عادية هدوم العيد بقت حاجة عادية كمان اليوم بقى رتمة عادى مش عايزة احدد ان العيد بالشكل دة ممكن يكون الشكل دة انا حاساة لوحدى لكن حتى لو كدة لية زمان كلنا كنا بنحس الفرحة ولية دلوقتى فينا ناس مش حاسة باى شعور اتجاة العيد اللهم الا صلاة العيد اللى من بعدها بينتهى العيد العيد زمان كان حاجة تانية دة اللى انا حاساة واللى مش قادرة احس غيرة وكمان مش عارفة غيرة بس عامة قدوم العيد يعنى سنة جديدة واللى كلنا بنتمناة انها تكون سنة طيبة كل سنة وانتم طيبين.